Miyerkules, Marso 23, 2011

Natatanging Kultura at Tradisyon ng Unibersidad ng Pilipinas (UP) at Unibersidad ng Sto. Tomas (UST) sa Paglipas ng Panahon

Abstrak

          Gaano ba kayo ka-pamilyar sa mga kultura, tradisyon o sabihin na nating mga gawi-gawi ng mga mag-aaral at maging mga propesor ng Unibersidad ng Pilipinas at Unibersidad ng Sto. Tomas? Natikman mo na din ba ang mga ipinagmamalaki nitong mga sikat na kainan at food stalls? at nakarating ka na ba sa mga kilalang atraksyon dito?

         Ang UST at UP ay kilala bilang dalawa lamang sa pinakamayaman at sikat na unibersidad sa Pilipinas, dahil sa kanilang mga naiibang kultura at tradisyon na naririnig o napapanood lamang natin sa mga radyo at telebisyon. Ngunit paano nga ba naiiba ang mga kultura at tradisyon na ito sa dalawang unibersidad na nabanggit? Mayroon din ba silang mga pagkakapareho? Sa anong mga aspeto? Sa pag-aaral na ito, nalaman ng mga mananaliksik na may malaking pagkakaiba ang UP at UST sa isa’t-isa, gayun din ang kanilang mga pagkakapareho. Malaki ang pagkakaiba ng UP at UST sa mga aspeto gaya ng relihiyon, mga tradisyon, pamamahala ng administrasyon ng unibersidad, uri ng mag-aaral, mga batas at polisiya, pamumuhay ng mga mag-aaral,  at mga selebrasyon. Sa kabilang banda naman nagkakapareho ang UST at UP sa pagpapahalaga sa kalidad ng edukasyon na kanilang ibinibigay sa kanilang mga mag-aaral, kakayahang pang-akademya, ang kinakaharap nilang suliranin sa mga pasilidad gaya ng mga laboratoryo, at sa aspeto ng pamumuhay ng mga mag-aaral tungkol sa pagkaing kanilang bilbilhin, masarap at sulit pero mura at kaya ng badyet. Dahil sa mga pagkakapareho at pagkakaibang ito nakikila ang UP at UST. 

Layunin at Kahalagahan ng Pag-aaral

Panimula

                Ang Unibersidad ng Sto. Tomas (UST) at ang Unibersidad ng Pilipinas (UP) ay dalawa sa pinakatanyag at pinakamayamang unibersidad sa Pilipinas pagdating sa kanilang ipinagmamalaking kasayasayan at kultura. Ngunit paano nga ba naiiba ang dalawang uniberisdad na ito sa isa’t-isa? Sa anong mga aspetong kultural nga ba talaga sila nagkakaiba? Mayroon din ba silang mga pagkakapareho? Ilan lamang iyan sa mga katanungan ng mga mananaliksik kung kaya’t sila’y nahikayat na buuin ang pananaliksik papel na ito. Dito pinag-aralan ng mga mananaliksik ang mga kultura at tradisyon ng dalawang unibersidad na nabanggit. Kasama sa pag-aaral ng kultura ng UP at UST ang mga selebrasyon na ipinagdiriwang taun-taon, mga pasilidad, mga kalakasan at kahinaan nito, mga mag-aaral (ang kanilang pamumuhay at mga gawi), mga propesor at guro, mga organisasyon, kakayahang pang-akademya at mga katangian nito na naiiba sa ibang unibersidad.


Layunin

                Ang pananaliksik papel na ito ay naglalayong (1) maunawaan ang kultura at tradisyon ng UP, Diliman at UST, (2) malaman ang mga pagkakaiba at pagkakapareho ng dalawang unibersidad na nabanggit, (3) a maikumpara ang UST at UP sa aspetong kultural at akademikal.
                Mahalaga ang pananaliksik na ito dahil ito ay maaari itong maging gabay ng mga mga-aaral sa sekundarya, kung ano sa dalawang unibersidad na nabanggit ang mapipili nilang pasukan pagdating ng panahon. Dito rin makikita sa pananaliksik papel na ito ang mga pagkakaiba at pagkakapareho ng UST at UP sa iba’t-ibang aspeto ng kultura at tradisyon. 

Mga Kaugnay na Babasahin at Pag-aaral Tungkol sa Kultura at Tradisyon ng Unibersidad ng Pilipinas at Unibersidad ng Sto. Tomas

           Kaakibat ng pag-aaral ng kultura at tradisyon ng UST at UP ay ang kanilang impormasyon tungkol sa kanilang kasaysayan, mga maipagmamalaking atraksyon, pamumuhay, kakayahang pang-akademya at marami pang iba.


    I.       Non- Academic

A.      Kasaysayan 

                Maikling Kasaysayan ng Unibersidad ng Sto. Tomas

    Kilala ang Unibersidad ng Sto. Tomas bilang pinakamatandang unibersidad hindi lamang sa Pilipinas at sa buong Asya (UST website). Ito ay nagmula sa 1500 na pera mula kay Monsignor Miguel de Benavides, O.P. at sa kanyang koleksyon ng mga aklat noong ika-24 ng Hulyo 1605. Noong una ito ay isang simpleng kolehiyo at silid-aklatan na sa simula ay para lamang sa mga seminarista . Ito ay sinundan ng pagtatatag ng UST noong ika-28 ng Abril 1611 bilang Kolehiyo  de Nuestra Señora del Santisimo Rosario sa Intramuros, Maynila ni Monsignor Miguel de Benavides, O.P., ang ikatlong arsobispo ng Maynila, katulong sina Frs. Domingo de Nieva and Bernardo de Santa Catalina (Lapuz, J.D., 2011).

Hindi nagtagal tinawag itong Kolehiyo de Sto. Tomas bilang pagbibigay pugay kay Sto. Tomas Aquinas, ang pinakamagaling na Dominikanong theologian. Noong ika- 25 ng Nobyembre 1645 ang Kolehiyo de Sto. Tomas ay ginawang isang unibersidad ni Pope Innocent X. Sa pamamayagpag ng mga Español sa Pilipinas ito ay tinawag ni Haring Charles III na “Royal” noong 1785. Habang nasa kamay ito ng monarkiya ng España patuloy ang pag-usbong ng UST sa katunayan ginawa itong “Public University of General Studies” ni Pope Innocent XI kasunod nito ang pagbibigay karapatan ni Pope Clement XII sa unibersidad na madagdagan ang mga programa o kursong itinuturo dito. Noong ika- 17 ng Septyembre 1902 binasbasan ito ni Pope Leo XIII bilang “Pontifical University”, at noong 1947 tinawag ito ni Pope Pius XII bilang “The Catholic University of the Philippines”.

Sa patuloy ng pagdami ng mga mag-aaral sa UST noong 1927 napilitan itong magtayo ng panibagong kampus mula sa Intramuros patungo sa Sampaloc, ang aktwal na lokasyon nito sa ngayon na may 21.5 ektaryang lupain. Dahil sa pag-usbong ng Ikalawang Digmaang Pandaigdig tuluyang nasira ang Intramuros kasabay nito ang pagkasira ng UST, Intramuros. Dalawang beses lamang nahinto ang pagtuturo sa UST, una, ay noong 1898-1899 panahon ng Philippine Revolution at ang digmaan sa pagitan ng mga Pilipino at Amerikano, at ang ikalawa ay noong 1942-1945, panahon ng kolonyalisasyon ng mga Hapon, ang Ikalawang Digmaang Pandaigdig. Patuloy pa rin ang pamamayagpag ng UST mula noon hanggang ngayon na naging dahilan kung bakit ito ang tinaguriang ang pinakamatandang unibersidad sa Pilipinas at maging sa Asya.


            Maikling Kasaysayan ng Unibersidad ng Pilipinas

     Itinatag ang Unibersidad ng Pilipinas noong ika-18 ng Hunyo 1908 sa pagpapatibay ng 1st Philippine Legislature Act. # 1870 o kilala rin bilang “Batas Pang-unibersidad.” Una nitong itinatag ang Philippine Medical School noong 1905 (na kinalaunan nagging Kolehiyo ng Medisina sa UP). Nagsimula itong maging aktibo noong 1907 isang taon bago ang pagkakatatag ng buong unibersidad. Kasama ang College of Fine Arts at College of Liberal Arts, ito ay itinatag sa isang gusali sa Padre Faura (Ermita) at R. Hidalgo (Quiapo) sa Maynila.

      Nagsimula ang paggawa ng panibagong kampus noong 1939 sa 493 ektaryang lupain sa Diliman at Rizal. Dahil sa pananakop ng mga Hapon noong Ikalawang Digmaang Pandaigdig nasira ang ilan sa mga gusali dito, at dahil doon ang pangulo ng UP na si Pang. Bienvenido Gonzalez ay humingi ng 13 milyon mula sa  US-Philippines War Damage Commission. Pagkatapos ng digmaan itinuloy ang pagsasaayos ng Diliman, nagtayo ng mga bagong imprastraktura gaya ng Gonzalez Hall, Melchor Hall, Kamia, Abelardo Hall, Quezon Hall,at ang Tirahan ng pangulo ng UP. Mula noong 1949 inilipat ang mga opisina ng administratibo ng UP sa Diliman mula sa Maynila kasabay ang Oblation. Mula noon nagsilbing pangunahing kampus ang Diliman. 


B.      Kampus

Mga atraksyon sa Unibersidad ng Sto. Tomas



   Fountain of Wisdom    


Miguel de Benavides Monument

UST Museum     

                                                            Quadricentennial Park



Mga atraksyon sa Unibersidad ng Pilipinas

Sunken garden

          Carillon Tower

  Academic Oval  

Oblation

         Gonzalez Hall (Main Library)                      

UP-Ayala Techno- Hub


C.      Mga Sikat na kainan sa UST at UP

Kung sa tingin ninyo na ang mga mag-aaral ng UST ay nakabase lamang sa mga kanian sa loob ng kanilang kampus o di naman sa carpark dyan kayo nagkakamali. Isang natural na bagay na sa ating mga Pilipinong kabataan ang mag-explore ng iba’t ibang bagay kasama na doon ang pagkain. Hindi nililimitahan ng mga Tomasino ang kanilang mundo sa loob lamang ng unibersidad ngunit maging sa labas nito. Napakaraming mga kainan, at food stalls kung tawagin sa labas ng mga pader ng UST na madalas puntahan ng mga mag-aaral lalong-lalo na yaong mga nagbabadyet ng kanilang mga baon. Ilan dito ay ang Mang Tootz na kilala sa kanilang banana-ram-a at pagkaing talagang abot-kaya ng badyet ng mga mag-aaral, ang mga food stalls sa Dapitan at P. Noval na nagbebenta ng masasarap na street foods gaya ng isaw, fish balls, barbeque, at marami pang iba. Kung gusto nyo namang matikman ang masarap na milk teas isa lang naman ang binibili ng mga Tomasino at ito ang Fanshu, Lovelite na kilala sa kanilang mga inumin na hindi mabigat sa bulsa ng mga mag-aaral, at scramble na mabibili sa loob ng carpark, Dapitan at P. Noval.

Kagaya ng UST ang UP Diliman ay may mga ipinagmamalaki ring mga mura ngunit masasarap kainan sa loob ng kanilang kampus. Isa na rito ang Rodic’s Food Express, na makikita sa loob ng Shopping Mall, Ang Rodic’s ay kilala sa kanilang tapsilog at mga abot - kayang lutong bahay na talagang binabalik-balikan ng mga mag-aaral at maging ng mga alumni ng UP. Kung mga sizzling na pagkain na abot - kaya ng badget naman ang hanap nyo hindi dyan magpapatalo ang Mang Jimmy’s Sizzlers sa MWSS compound sa UP Diliman. Ang kainan na ito ay madalas puntahan ng mga mag-aaral lalo na ng mga grupo dahil na rin sa iba’t-ibang promo na inooffer nila sa mga estudyante. Isaw ba at iba’t-ibang mga lutong kalye ang ipinagmamalaki naman ng food stall ni Mang Larry sa harap ng Kalayaan Residence Hall. Halos lahat yata ng mga mag-aaral sa UP ay kilala ang food stall nya hindi lang dahil inihahanda nyang mga murang pagkain, kung hindi sa sarap at malinis nitong mga lutong kalye na kanyang ibinebenta araw-araw, kada alas 3 hapon hanggang ala 9 ng gabi. Marami pang mga kilalang mura at masasarap na kainan sa UP gaya ng Treehouse Restaurant, Lola Lita’s, Beach House Barbeque, Lutong Bahay, Long Island at U.P. Manininda.

Sa kabilang dako naman may mga restawran at kainan din sa loob ng UP Diliman kampus ang masasabing may kamahalan. Ilan dito ay ang: R.O.C (Restaurant of Choice) na kilala na tambayan ng mga mag-aaral dahil sa free Wi-fi Internet nito at sa kanilang masarap na burger; Khas Food House na kilala sa kanilang Persian at Indian foods; ang The Chocolate Kiss Café; at Chateau Verde ay kilala naman dahil sa kanilang mga pasta, steaks, salads at marami pang iba.


     II.        Academic

Mga Programa sa UST at UP na pinarangalang Sentro ng Kagalingan ng CHED

Hindi naman maipagkakaila ang UP at UST ay ang dalawa sa apat na unibersidad sa Pilipinas na tinaguriang Big Four of the Philippine Universities, kasabay ang Ateneo de Manila University at De La Salle University. Ito ang nagpapatunay na ang UP at UST ay dalawa lamang sa mga unibersidad sa ating bansa na nagbibigay ng mataas at may kalidad na lebel ng edukasyon sa mga Pilipino at maging sa ibang lahi. Kaakibat ng kanilang pagkakasama sa Big Four ay ang mga programa sa kani-kanilang unibersidad na pinarangalan ng Commission on Higher Education o CHED bilang Sentro ng Karangalan.

Sa Unibersidad ng Sto. Tomas nakamit ng mga programa o kursong Pilosopiya, Literatura, Chemistry, Arkitektura, Narsing at Biology ang nasabing parangal para sa taong 2010 hanggang 2011 . Sa Unibersidad ng Pilipinas Diliman kampus naman nakuha ng mga programang Information Technology, Kemistry, Geology, Molecular Biology, Physics, Statistika, Marine Science, at Matematika ang pagiging Sentro ng Kagalingan para sa taong 2010 hanggang 2011. 


Paglalahad ng Sariling Pag-aaral Tungkol sa Kultura at Tradisyon ng Unibersidad ng Pilipinas at Unibersidad ng Sto. Tomas

              A.  Metodolohiya  

Maingat na sumangguni ang mga mananaliksik sa mga websites, mga balita sa telebisyon at dyaryo, at mga libro sa aklatan ng Unibersidad ng Sto. Tomas  (Miguel De Benavides Central Library).. Nagsagawa rin ng imersyon o pakikisalamuha sa iba’t ibang komunidad ang mga mananaliksik upang maranasan ang mga naiibang pamumuhay, kultura at tradisyon ng dalawang unibersidad. Nagkaroon din ng inquiry o impormal na pagtatanong sa limang mag-aaral at isang propesor sa bawat unibersidad na nabanggit. Gumamit din ng kamera, papel, bolpen, at mga tanong bilang mga instrumento ng pangangalap ng impormasyon.


      B. Paglalahad ng mga Nakalap na Impormasyon


1.       IMERSYON

Sa isinagawang imersyon ng mga mananaliksik noong ika- 11 at 18 ng Pebrero, at ika-4 ng Marso, 2011, masasabi talagang may malaking pagkakaiba ang UST sa UP. Isa na rito ang lawak ng kanilang kampus. Dahil sa halos kalahati o higit pa ang lawak ng UP kumpara sa UST,  mayroon silang tinatawag na “UP Ikot” ito ang mga dyip na umiikot sa loob ng unibersidad upang magsilbing isang paraan ng mabilis na transportasyon sa mga mag-aaral at maging sa mga propesor dito. Dahil isang pampublikong unibersidad ang UP, isa sa pinakamalaking bahagi na bumubuo sa populasyon nito ay ang mga kabataang mag-aaral na taglay ang mataas na lebel ng katalinuhan, ngunit salat o walang sapat na pera upang makapag-aral sa mga pribadong unibersidad. Samantala, ang UST naman na isang pribado at katolikong unibersidad ay binubuo ng mga mag-aaral na ang lebel ng pamumuhay ay kasama sa sinasabi nating average at mayayaman. Kung ikukumpara ang UP sa UST sa aspetong pangrelihiyon, napakalaki ng gap nito sa isat’-isa. Pareho silang mayroong tig-isang chapel sa loob ng kampus para sa mga Katoliko, ngunit mayroon lamang ibinibigay na sapat na oras ang chapel sa UP para sa mga taong gustong dumalaw at makinig ng misa. Samantala sa UST, hindi nawawalan ng mga tao sa loob, at bukas ito mula umaga hanggang gabi. Karamihan ng mga mag-aaral sa UST mga Romano Katoliko. Sa isang tabi, sa UP napakarami ang mga mag-aaral na nabibilang sa ibang relihiyon at paniniwala. Makikita rin sa kanilang mga dress codes  ang pagkakaiba ng dalawang unibersidad na ito. Dahil sa isang malayang unibersidad ang UP, wala silang uniporme. Kung baga masusuot mo lahat ng naisin mo basta’t hindi ito kamali-malisya. Sa kabilang banda naman, ang mga estudyante ng UST ay obligadong magsuot ng uniporme depende sa kolehiyo na kanilang kinabibilangan. Ang UST din ay isang “smoke-free campus”, samantalang ang UP naman ay hindi. Dito makikita na mas  malaya ang mga mag-aaral sa UP. Isang patunay nito ay ang pagkakaroon ng mga “rally” at papalaking numero ng mga aktibistang taga-UP. Samantala, ang UST ay isang mahigpit na unibersidad na nagbibigay halaga sa kanilang mga polisiya. Hindi rin gaanong radikal ang mga Thomasian kung ikukumpara mo sa mga tinaguriang “iskolar ng bayan.” Kagaya ng ibang uniberisdad sa Pilipinas may kanya-kanyang mga sikat na kainan ang UP at UST na talaga namang kanilang ipinagmamalaki. Kaya sa pagsagawa ng emersyon ng mga mananaliksik hindi nila ito pinalagpas. Ilan sa mga ito ay ang Rodic’s, Mang Larry’s, ROC (Restaurant of Choice), Chocolate Kiss at Myrna’s Ice cream ng UP, Mang Tootz, at ang mga food stalls sa Asturias at Dapitan ng UST. Masarap at talagang nakabubusog ang mga lutong bahay ng Rodic’s, lalong- lalo na ang kanilang tapsilog. Sa kabilang banda, hindi talaga maipagkakaila ang masasarap na pagkain sa Mang Tootz, lalong-lalo na ang kanilang sikat na banana-ram-a at mga lutong bahay na abot’ kaya. Sikat ang Mang Larry’s sa kanilang isaw, at mga street foods na talagang swak sa badyet at binabalik-balikan ng mga mag-aaral, propesor at maging ng mga  turista. Mas marami ring mga gusali sa UP, Diliman kumpara sa UST. Kahit na pereho silang “open university” hindi pa rin basta-bastang makakapasok ang mga hindi mag-aaral o kawani ng unibersidad kung wala silang sapat na rason sa UST. Sa isang tabi kahit sino ay pwedeng makapasok sa UP, sa katunayan naobserbahan din ng mga mananaliksik na marami ang mga kabataang nangongolekta ng mga bote at mga nanglilimos ang nakakapasok sa UP.








            

2.       INQUIRY     
a.       Inquiry sa Limang Mag-aaral ng Unibersidad ng Pilipinas

 

          Ayon sa mga mag-aaral ng Unibersidad ng Pilipinas, ilan sa mga kilalang atraksyon sa kanilang unibersidad ay ang Oblation, Sunken Garden, Palma Hall, Carillon Tower, Mang Larry’s Isaw, Acad Oval, Quezon Hall, UP Theater at ang UP Film Institute. Sa kabilang banda naman, ang  mga selebrasyon na taunang nagaganap at talagang pinaghahandaan ng UP ay ang Oblation Run, UP Fair, Diliman Month, at ang Parolan (Lantern Parade). Ilan din sa mga organisasyon na binanggit ng mga mag-aaral na aming natanong ay ang USC (University Student Council) na nagoorganisa ng mga extracurricular activities sa buong unibersidad, ang STAND-UP, KAISA, ALYANSA, APO, at CHEMJOC. Nang itinanong din ng mga mananaliksik sa mga mag-aaral kung bibigyan nila ng marka o grado ang mga pasilidad, ang nakuhang marka para sa kabuan ay 5.8. Samantala, nang pinalarawan ng mga mananaliksik ang kanilang unibersidad pagdating sa uri ng mag-aaral, kakayahang pang-akademya, kultura, pasilidad, pamamalakad ng mga organisasyon, mga selebrasyon at mga propesor ito ang kanilang nakuhang mga sagot. 

Uri ng mag-aaral
matalino, radikal, masisipag, “open-minded”, may kalayaan, at kakaiba 
Kakayahang pang-akademya
nangunguna, magaling, mahalaga sa mundo, at  tunay na maipagmamalaki
Kultura
iba-iba, open-minded, liberated, at free-thinkers
Pasilidad
luma, “well-utilized”, may kasaysayang nakakubli, kulang pero may mga bagong pinapatayo at inaayos
Pamamalakad ng mga organisasyon
organisado, bigatin, maayos, at epektibo
Selebrasyon
masaya, televised, buhay na buhay, magulo, bonnga, makulay, at maipagmamalaki
Propesor
wala masyadong “personal attachment” sa mga estudyante, magagaling, matatalino,  kwela, mababait, open-minded, at cool




b.       Inquiry sa limang Mag-aaral ng Unibersidad ng Sto. Tomas    

     
           Kagaya ng UP, may mga ipinagmamalaki ring mga atraksyon ang UST. Ayon sa limang mag-aaral na aming natanong ilan sa mga ito ay ang Main Building, UST Museum, Lover’s lane, Arch of the Century, Quadricentinneal Park, Tinoco Park, Tan Yan Kee Building, Miguel de Benavides Library, at ang mga floats at fireworks tuwing may mga selebrasyon gaya ng Architeture Week at Paskuhan. Ang mga selebrasyon naman na taunang nagaganap sa UST ay ang, Paskuhan, Freshmen Walk, Job Fair, Org Fair, at ang buong linggong selebrasyon ng iba’t-ibang kolehiyo sa UST. Ilan din sa mga organisasyong kanilang nabanggit ay ang YFC (Youth For Christ), na nagbibigay serbisyo para sa Diyos, SOCC , ang sinasabing umbrella organization ng UST, TOMCAT, APO,Red Cross, Yellow Jackets, at ang UNICEF. Nang tinanong  naman ng mga mananaliksik ang mga pasilidad sa kanilang unibersidad sa pamamagitang ng pagbibigay ng marka mula 1 (pinakamababa) hanggang 10 (pinakamataas), 8.2 ang grado na nakuha ng UST. Sa kabuuan, nang ipinalarawan ng mga mananaliksik ang kanilang unibersidad pagdating sa sa uri ng mag-aaral, kakayahang pang-akademya, kultura, pasilidad, pamamalakad ng mga organisasyon, mga selebrasyon at mga propesor ito ang kanilang nakuhang mga sagot.

Uri ng mag-aaral
magaling, halo-halo, committed, magalang, Thomistic, at holistic
Kakayahang pang-akademya
may ibubuga, competitive, mahusay, at mataas ang kalidad
Kultura
maka-Diyos, universal, madaming polisiya at batas, at high-context culture
Pasilidad
maayos, at katamtaman
Pamamalakad ng mga organisasyon
maayos, epektibo, organisado, at matino
Selebrasyon
nakamamangha, bongga, masaya, at maraming mga “activities” at pakulo
Propesor
may sapat na kakayahang magturo, may kredibilidad, mahigpit, weird, competent,  at maunawa



c.      Inquiry kay Ginoong Alvin Joseph J. Tang, isang guro ng UP, Diliman

Upang maunawaang mabuti ang kultura ng Unibersidad ng Pilipinas, nagsagawa rin ng isang impormal na pagtatanong ang mga mananaliksik sa isang guro ng UP, si G. Alvin Joseph J. Tang.

         Ano po sa tingin ninyo ang mga bagay na maipagmamalaki ng inyong unibersidad?
magaling na mga guro at magandang curriculum
         Ano naman po ang masasabi ninyong kahinaan nito?
mahinang pondo
        Anu-ano naman pong mga selebrasyon ang masasabi ninyong talagang pinaghahandaan ng buong unibersidad?
Lantern Parade (Parolan)
         Sa kabuoan po paano ninyo mailalarawan ang inyong unibersidad agdating sa:
a.       mga mag-aaral                                     
b.      kapwa propesor
c.       mga selebrasyon
d.      mga pasilidad
e.      kakayahang pang-akademya
f.        kultura at mga tradisyon



     a.      mayayabang ngunit magaling.
     b.      magagaling
         c.       minsan masyadong engrande
     d.      kulang at luma
     e.     sa kabuuan magaling ang UP
         f.  diverse ang kultura at tradisyon,  dahil galing sa iba’t-ibang lugar ang mga mag-aaral at maraming organisasyon na iba-iba ang interes.



d.       Inquiry kay Prop. Daniel D. Vicario, propesor ng Kolehiyo ng Agham ng UST

Nagsagawa rin ang mga mananaliksik ng isang inquiry o impormal na pagtatanong kay Prop. Daniel D. Vicario, ng UST.

          Ano po sa tingin ninyo ang mga bagay na maipagmamalaki ng inyong unibersidad?
kasaysayan, lokasyon at kalidad ng edukasyon
          Ano naman po ang masasabi ninyong kahinaan nito?
Pagdating sa Agham at Teknolohiya kulang ang mga pasilidad ng UST. Masyado rin itong tradition-oriented pagdating sa edukasyon at pamamahala.
         Anu-ano naman pong mga selebrasyon ang masasabi ninyong talagang pinaghahandaan ng buong unibersidad?
Mga religious celebrations gaya ng Paskuhan, at ang mga makasaysayang mga selebrasyon.
         Sa kabuoan po paano ninyo mailalarawan ang inyong unibersidad agdating sa:
a.       mga mag-aaral

b.      kapwa propesor





c.         mga selebrasyon    

d.        mga pasilidad





e.       kakayahang pang-akademya
f.           kultura at mga tradisyon



     a.       mababait, masunurin, matatalino at magagaling
     b.      Karamihan sa kanila ay relihiyoso, magalang, at authorative. Competent nga lahat, pero meron din namang iba na parang hindi epektibo ang stratihiya ng pagtuturo.

      c.         Magastos at disruptive sa klase kaya minsan nahuhuli ang mga lessons.
      d.      pagdating sa mga silid-aklatan, silid-aralan, at mga kagamitan sa pagtuturo, ok kumpleto, ngunit pagdating sa mga laboratoryo at mga kagamitan dito hindi gaanong moderno at kumpleto

     e.       kasing galing ng UP at Ateneo
     f.         strikto ang mga batas at polisiya, napakarelihiyoso at talagang binibigyan ng halaga ang kasaysayan ng UST


             C.  Kongklusyon


    Mahihinuha mula sa nakalap na mga impormasyon ng mga mananaliksik, talagang may malaking pagkakaiba ang UP sa UST lalong-lalo na sa kanilang mga kultura at paniniwala. Ilan sa mga aspetong ito ay ang relihiyon, mga tradisyon, pamamahala ng administrasyon ng unibersidad, uri ng mag-aaral, mga batas at polisiya, pamumuhay ng mga mag-aaral,  at mga selebrasyon. Ang UST ay isang unibersidad na relihiyoso na halos lahat ng mga selebrasyon dito ay may kaakibat na religious at tradisyonal na paniniwala, samantalang ang UP ay may malaking pagpapahalaga sa kalayaan at kakayahan ng kanilang  mga mag-aaral,  na pamunuan at makapag-isip ng mga makabagong selebrasyon sa kanilang unibersidad. Isa rin ang UST sa pinakastriktong unibersidad dahil sa sobrang pagpapahalaga nito sa kanilang mga polisiya at batas na ipinatutupad. Sa kabilang banda naman, ang UP ay isang malayang unibersidad.  Dahil, karamihan sa mga mag-aaral ng UST ay Katoliko, isa sa mga katangian ng mga estudyante dito ay ay pagiging relihiyoso, tahimik at pagiging masunurin. Ang mga mag-aaral ng UP naman ay kilala sa kanilang katalinuhan, pagiging independent at malaya, at ang iba naman ay kilala sa kanilang pagiging aktibo sa mga rally na bumabatikos sa pamahalaan. Isang pribadong unibersidad ang UST kung kaya’t karamihan pa rin ng mga mag-aaral dito ay nabibilang sa naka-aangat  na lebel ng buhay.  Dahil sa isang pampublikong unibersidad ang UP, ang mag-aaral dito ay talagang tinatawag na “Iskolar ng Bayan”, karamihan sa kanila ay hindi kabilang sa sinasabing upper class o yaong mga naka-aangat sa buhay.

Mayroon din namang pagkakapareho ang UST at  UP. Pareho nilang pinahahalagahan ang kali- dad ng edukasyon na kanilang ibinibigay sa mga mag-aaral, kung kaya’t sinisigurado nila na magagaling at competent ang mga propesor at gurong sa kanilang unibersidad. Hindi rin nagkakalayo ang pamumuhay sa dalawang unibersidad na ito. Kahit isang pribadong unibersidad ang UST at isang pampublikong unibersidad ang UP, ay mga mag-aaral dito ay parehas ang hanap pagdating sa aspeto ng pagkain, masarap ngunit abot-kaya ng badyet. Kung kaya’t maraming mga kainan at food stalls ang mahahanap sa mga unibersidad na ito. Pareho ring kinakaharap ng UP at UST ang problema sa kanilang mga pasilidad lalong-lalo na pagdating sa kanilang mga laboratoryo. Hindi rin nagkakalayo ang kakayahan ng UP at UST pagdating sa akademya, sapagkat kagaya ng ibang mga unibersidad may kanya-kanyang expertise ang UP at UST.